Center for Korean Studies (CKS) iha UNTL, nu’udár únika Sentru ba Estudu Koreanu iha Timor-Leste, hala’o palestra internasionál konaba Korean movie uza Taxi Driver hodi hatudu katak Korea mós uluk haruka ninia ema ba sai traballadór iha Saudi Arabia no mós iha Alemaña (Germany). Palestra espesiál ida ne’e hala’o iha CKS UNTL, Sesta-feira 24 Marsu 2023. Oradór prinsipál husi The University of York, UK.
Benefisiu husi palestra ne’e mak partilla istória ida katak traballadór Koreanu ida naran Kim Sa-bok ne’ebé uluk serbisu iha Saudi Arabia fila ba Korea no konsege investe ba negósiu sosa taxi no lori rasik. Istória ne’e hetok interesante tanba taksista ne’e ikusmai hasoru malu ho jornalista Hinzpeter (ema Germany) ida ne’ebá hakarak ba halo kobertura konaba masakre boot ne’ebé akontese iha Gwangju, 20 Maiu 1980. Jornalista ne’e aluga taksista Kim Sa-bok nia taksi husi Seoul ba Gwangju. Iha filme ne’e, sira na’in rua atu mate salsala tanba militar Koreanu duni tuir atu kaer. Filme ne’e haktuir di’ak tebes masakre Gwangju ne’ebé akontese iha era Chun Doo-Hwan (1979 -1980) iha Gwangju.
Ne’e istoria tinan 40 liubá, hatudu katak Gwangju mak loke uluk dalan ba movimentu pro-demokrasia iha Korea. Agora Gwanju sai sidade boot no timoroan atus mak serbisu iha ne’ebá.
“Korea Sul iha kazu susesu barak. foin-sa’e sira iha ne’e hatudu kuriozidade ba aprende Korea ninia istória susesu. Filme ida ne’e hatudu istoria ida katak Korea, ne’ebé uluk mos sai traballador iha Germany, ninia traballadór mós bele lori mudansa ba nasaun. Korea bele, entaun Timor-Leste mós bele, tuir konstestu Timor-Leste. Ha’u hakarak haree foin-sa’e sira bele iha perspetiva ba moris di’ak” haktuir aprezentadór prinsipál, Sr. Kim Young-gil, ne’ebé mos nu’udár peskizadór husi the University of York, UK.
Jornalista ida husi Timor Post fó mós ninia observasaun kazu susesu Korea nian seluk ida kona-ba Saemul Undong (konseita dezenvolvimentu rural ne’ebé konsege transforma mentalidade ema Korea iha 1970 – 1980).
Eventu ne’e partisipa husi UN Women ninia voluntáriu, Timor Post, ESHANA, Alumni Korea no mos estudantes lian Korea husi CKS UNTL.
Palestra espesiál nune’e CKS UNTL sei hala’o dala tolu tan ba tinan ida ne’e. Ba hirak ne’ebé hakarak partisipa, bele mai vizita sentru ne’e iha UNTL, besik malu ho Uma Amerika.
CKS nia agradesimentu espesiál ba Pro Reitór ba Asuntu Kooperasaun UNTL nian, Prof. Tomé Jeronimo ba apoiu tomak ba sentru ne’e ninia atividade sira. CKS hakarak mós hato’o agradese wa’in ba SHOWBOX KOREA ne’ebé fó lisensa ba CKS UNTL hodi hatudu filme “Taxi Driver” iha Timor-Leste. Ami mós agradese wa’in ba kompañia GLOBAL YUNIS CO.,Ltd. ba kontibuisaun bebida nutritiva Korea nian (Misutgaru).
