Israel no Estadus Unidus ataka ona alvu liu 2.000 iha Iraun tomak dezde lansa ofensiva militár konjunta iha sábadu dadeer, fó sai The Wall Street Journal, hodi sita fonte rua ne’ebé koñese operasaun ne’e.
Tuir relatóriu, ofensivu hahú iha sábadu dadeer no envolve kampaña aérea ida ho eskala boot.
Militár israelita sira hatete katak tiru projétil rihun resin no hala’o misaun liu 700 iha teritóriu iranianu dezde inísiu ofensivu nian.
Alvu sira inklui figura militár no polítiku sira ho nivel aas, hanesan Líder Supremu Iraun nian, Ayatollah Ali Khamenei no komandante sira hosi Korpu Guarda Revolusionáriu Izlámiku, no mós sistema defeza aérea, misil balístiku sira no sira nia lansador sira, instalasaun sira intelijénsia nian, no sentru komandu sira.
Ofisiál militár israelita ida hatete ba jornál katak forsa israelita no norte-amerikanu sira serbisu hamutuk durante fulan barak hodi halibur lista alvu sira ne’ebé komprensivu, hodi dedika oras rihun ba rihun ba halibur informasaun no preparasaun ba operasaun.
Atake konjuntu ne’ebé lansa iha loron-sábadu ne’e, haktuir katak, hamate líder iranianu sira ho pozisaun aas oioin, inklui Ayatollah Ali Khamenei. Teheran hatán hodi lansa série ida hosi atake sira ho drone no misil sira hasoru Israel, alvu sira hosi EUA, no nasaun oioin iha rejiaun Golfu nian.
Eskalasaun ida-ne’e akontese hafoin atake sira ne’ebé hanesan hosi Israel no Estadus Unidus hasoru Iraun iha fulan-Juñu tinan kotuk, ne’ebé hamosu funu ida durante loron 12 antes deklara sesárfogu.(ANADOLU)
