Jakarta, 14 Setembru 2026 — Fundasaun ASEAN anúnsia faze foun programa “AI Ready ASEAN”, ne’ebé agora hetan apoiu husi AI Opportunity Fund: Asia-Pacific, ho objetivu atu hametin literasia no abilidade prátika kona-ba Inteligénsia Artifisiál (AI) iha setór edukasaun ASEAN.
Inisiativa ne’e hetan endosu ofisiál durante Sesaun Aberta Enkontru Ofisiál Superiór ASEAN kona-ba Edukasaun (SOM-ED) ba dala 21, no sei implementa to’o rohan tinan 2028.
Programa ne’e sei fó benefísiu ba estudante kuaze 1,7 millaun, inklui profesór sira husi ensinu primáriu to’o sekundáriu, estudante ensinu superiór no membru fakuldade universidade sira, liuhusi formasaun kona-ba uza AI ho responsabilidade no efetividade.
Fundasaun ASEAN hala’o programa ne’e iha kolaborasaun ho AVPN, ho apoiu husi Google.org no Banku Dezenvolvimentu Aziátiku (ADB).
Diretór Ezekutivu Fundasaun ASEAN, Dr. Piti Srisangnam, hateten katak faze dahuluk programa ne’e hatudu katak joven, edukadór no komunidade sira iha rejiaun ASEAN prontu atu aprende no uza AI bainhira sira hetan ferramenta no apoiu ne’ebé apropriadu.
“Faze 2 sei liu hosi etapa konxiénsia no foka liután ba dezenvolvimentu abilidade prátika AI,” nia dehan.
Foka ba edukasaun no preparasaun forsa traballu
Iha faze foun ne’e, Fundasaun ASEAN sei kolabora ho Parseiru Implementadór Lokál (LIP) sira iha nasaun membru ASEAN atu dezenvolve kurríkulu ne’ebé adapta ba realidade lokál no fornese formasaun AI aplikadu.
Formasaun sei inklui profesór ensinu primáriu no sekundáriu, estudante ensinu superiór no profesór universidade sira. Objetivu mak ajuda edukadór no estudante sira integra AI ho maneira responsavel iha ensinu, aprendizajen, peskiza no preparasaun ba merkadu servisu.
Fundasaun ASEAN mós sei servisu hamutuk ho Ministériu Edukasaun sira iha Estadu-membru ASEAN atu asegura programa ne’e alinha ho prioridade nasionál iha área AI no edukasaun.
Aleinde formasaun, sei hala’o enkontru rejionál no nasionál ne’ebé envolve governu, profisionál AI, akadémiku, sosiedade sivíl, organizasaun internasionál, mídia no reprezentante benefisiáriu sira. Enkontru sira sei fó oportunidade atu fahe koñesimentu no dezenvolve polítika no estratéjia kona-ba edukasaun AI bazeia ba evidénsia.
Enkontru Rejionál ba dala 4 programa ne’e sei hala’o iha Singapura, iha Dezembru 2026.
Fundu ho osan tokon US$35 millaun
AI Opportunity Fund: Asia-Pacific mak programa rejionál ho osan tokon US$35 millaun, lidera husi AVPN ho apoiu husi Google.org no ADB.
Fundu ne’e lansa iha 2024 ho objetivu atu ajuda edukadór, traballadór no empreza mikro, ki’ik no médiu (MSMEs) iha Ázia-Pasífiku adapta ba mudansa ne’ebé AI lori.
Tuir informasaun Fundasaun ASEAN, to’o Juñu 2026, fundu ne’e sei fó ona formasaun ba traballadór liu 500.000 no negósiu ki’ik 50.000 iha rejiaun Ázia-Pasífiku.
Programa “AI Ready ASEAN” mos aliña ho prioridade rejionál ASEAN nian, inklui planu estratéjiku ASEAN kona-ba dezenvolvimentu sosiál no kulturál, dezenvolvimentu ekonómiku no edukasaun ba períodu 2026–2030.
