PEKIN, 14 Outubru (Xinhua) — Deklarasaun ida ne’ebé maka’as tebes hosi Ministériu Finansa Xina nian, ne’ebé fó sai “medida sira hamenus dívida nian ne’ebé maka’as liu iha tinan hirak ikus ne’e”, hetan atensaun signifikativu tantu iha rai-laran no mós iha nivel internasionál.
Iha konferénsia imprensa ida iha loron-sábadu, ministru Finansa Lan Fo’an fó sai planu ida hodi hasa’e substansialmente tetu dívida governu lokál nian iha osan ida de’it, hodi loke dalan ba substituisaun dívida lokál subar sira ne’ebé eziste liuhosi emisaun obrigasaun governu nian barak liután.
Movimentu ne’e hein atu ajuda klarifika no hamenus neineik risku sira dívida implísita nian, hatete hosi analista sira.
Estimativa sira sujere katak eskala hosi ronda foun ida-ne’e hosi substituisaun dívida nian bele liu 2.2 triliun yuan (besik 311 biliaun dolar amerikanu).
Ministériu estabelese kuota ida ba emisaun obrigasaun nian liu 2.2 trilhaun yuan iha 2023 hodi apoia lokalidade sira, partikularmente área sira ho risku aas, hodi rezolve risku dívida sira ne’ebé eziste no hamoos atrazu sira ne’ebé deve ba empreza sira. Kuota adisionál 1.2 triliun yuan nian maka arranja ona iha tinan ida-ne’e.
Dívida subar ho kustu aas no ba tempu badak troka hela ho obrigasaun sira ho taxa juru ne’ebé ki’ik liu no períodu pagamentu ne’ebé naruk liu, hatete hosi Luo Zhiheng, xefe ekonomista hosi Yuekai Securities. “Iha prosesu substituisaun dívida nian, risku sira sei hamenus.”
Dívida implísita pendente sira ne’ebé rejista iha plataforma governu nian iha nasaun tomak tun pursentu 50 kompara ho tinan lima liubá iha finál 2023, Lan hatete, hodi nota katak risku sira bele kontrola.
Peritu sira fiar katak medida sira hamenus dívida nian iha pipeline ne’e hakat liu jestaun risku nian no dezeña atu hasa’e kapasidade gastu nian hosi governu lokál sira.
Governu lokál sira responsavel ba besik pursentu 86 hosi gastu públiku sira nasaun nian, enkuantu orsamentu sentrál konta ba besik pursentu 14.
Haree ba papél krítiku hosi governu lokál sira iha dezenvolvimentu ekonómiku Xina nian — iha ne’ebé sira dudu demanda, atrai investimentu no forma ambiente negósiu lokál — hametin finansa governu lokál nian maka importante tebes.
He Daixin, investigadór seniór ida iha Akademia Xineza Siénsia Sosiál nian, hatete katak substituisaun dívida subar sira permite governu lokál sira atu funsiona ho efisiente liu, hasa’e sira nia abilidade atu investe, estimula konsumu no garante ema nia moris-di’ak.
Governu lokál sira sei hetan kbiit atu hola papél ida ne’ebé proativu liu iha dezenvolvimentu ekonómiku, nune’e hadi’a ambiente negósiu nian, hasa’e konfiansa merkadu nian no produz liután efeitu multiplikadór ida, Nia hatete.
(Fonte:Xinhua)
