Timoroan sira ne’ebé rejistu iha ajénsia Ilimanu ho objetivu atu hetan empregu iha nasaun Polandia sente sai vítima. Ho nune’e vítima sira reklama na’in ba ajénsia Ilimanu, Ricardo Nheu ho Rogério Tiago Lobato atu fó fila osan.
Iha tinan 2022, Rogério Tiago Lobato, hamutuk ho Ricardo Nheu, loke Ajénsia ida ho naran Ilimanu, iha Hudi Laran Dili. Ajénsia ne’e halo rekrutamentu ba joven na’in 2000 (rihun rua) hodi haruka ba servisu iha Polándia.
“Ami parte lubun ida ne’e sai ona vítima,” deklara portavós António Correia iha Konferénsia ba imprensa, iha Café Love Story Fomentu Dili, Sábadu (19/10).
“Ami ezije ba iha señor Rogério Tiago Loabatu no mós Ricardo Nheu atu devolve fila-fali ami nia osan ne’ebé mak ami kada ema ida hatama 200USD ba ajénsia” ezije vítima ne’e.
Vítima haktuir, momentu ajénsia loke, Rogério Tiago Lobato, ho Ricardo Nheu, realiza enkontru ida ho kandidatu traballadór sira iha Timor Logde, promete joven sira ne’ebé rejistu tenke ba servisu iha Polandia.
Hafoin rejistu, ajénsia Ilimanu husu kada kandidatu hatama osan montante 200USD, depois husu kandidatu sira trata pasaporte. Momentu ne’ebá joven lubuk maka preparadu. Ikus mai, promesa hosi Rogério Tiago Lobato, ho Ricardo Nheu la realiza to’o ajénsia mós taka.(Fonte Timor Post)
