Iha loron 1 fulan Abríl tinan ne’e, Sekretáriu Jerál Partidu Demokrátiku (PD), Antonio da Conceição “Kalohan” hasoru malu ho Sekretáriu Jerál Partidu FRETILIN, Marí Bim Amude Alkatiri, hodi toka asuntu-rua maka hanesan, solidariedade no polítika rai-laran.
“Ha’u simu telefone husi doutor Mari maka hato’o fali ninia solidariedade ba ha’u ba situasaun ne’ebé maka ha’u hasoru. No Doutor Mari fó ninia mensajen, solidariedade no fó korajen ba ha’u atu bele hasoru situasaun ne’e,” Kalohan klarifika ba jornalista sira, iha resintu Parlamentu Nasionál, Kuarta (03/04/2024).
Deputadu ne’e mós sente kontente bainhira iha lider nasionál ida sei bele fó korajen no solidariedade ba problema ne’ebé nia (kalohan) hasoru durante ne’e. Hasoru malu ida ne’e, atu komprementa malu iha tempu ne’ebé relijiaun-rua hanesan katólika no Musulmanu hala’o sira nia atividade paskua no ramadan.
“Ho situasaun ida ne’e, ha’u mós aproveita ko’alia oituan kona-ba situasaun rai-laran nian, ne’ebé ita hotu preokupa, ita iha ona governasaun ida ba dasia ona, fulan Maiu mai ita halo ona aniversáriu restaurasaun independénsia ba tinan-ruanulu-resin-rua, konstituisaun ita nian ne’e tinan-lima eleisaun dala-ida. Se ita iha tinan-22 signifika ita iha Governu karik dahaat ba metade, agora pergunta ba ita, tanbasá ita iha tiha ona Governasaun dasia”, Kalohan preokupa.
Iha audiénsia ne’e mós lider na’in-rua troka impresaun hodi haree ba futuru Timor-Leste nian, liluiu nia (Kalohan) hanesan deputadu hodi aproxima ho bankada hotu iha Parlamentu Nasionál.
