KATHMANDU, Nepal (AP) — Líder espirituál polémiku ida iha Nepal ne’ebé koñesidu ho naran “Buddha Boy” hetan kondenasaun ba tinan 10 iha prizaun iha Segunda-feira tanba halo agresaun seksuál ba menór ida, haktuir ofisiál tribunál sira.
Ram Bahadur Bamjan — ne’ebé ema balun fiar katak nia maka reenkarnasaun hosi fundadór budizmu nian — hetan mós orden atu selu indemnizasaun $3,700 ba vítima hosi juis ida iha Tribunál Distritál Sarlahi iha súl Nepal nian.
Mane ne’e sei iha loron 70 hodi halo rekursu hasoru despaxu tribunál nian, hatete hosi ofisiál tribunál nian, Sadan Adhikari.
Polísia kaer Bomjan hosi subúrbiu ida iha kapitál Nepal nian, Kathmandu, iha Janeiru tanba akuzasaun asaltu seksuál no deskonfia envolvimentu iha dezaparesimentu hosi pelumenus nia seguidor na’in haat.
Nota sira nepalés nian ho folin dolar rihun 227 no moeda estranjeiru sira seluk hamutuk dolar rihun 23 maka prende hosi nia iha momentu kapturasaun nian, haktuir hosi polísia.
Iha semana kotuk tribunál konsidera nia kulpadu tanba halo agresaun seksuál ba labarik-feto ida ho idade menus.
Akuzasaun sira relasiona ho dezaparesimentu sira hosi nia seguidor sira sei hein hela julgamentu.
Bamjan fiar hosi ema Nepalés barak hanesan reenkarnasaun hosi Siddhartha Gautama, ne’ebé moris iha loromonu Nepal nian iha tinan 2,600 liubá no sai respeitadu nu’udar Buda. Matenek-na’in budista sira la fiar ba Bamjan nia alegasaun sira.
Bamjan sai famozu iha súl Nepal nian iha tinan 2005.
Nia popularidade tun ona tanba akuzasaun sira kona-ba asaltu seksuál no fíziku sira hasoru nia seguidor sira, maibé nia mantein nafatin akampamentu sira iha súl Nepal nian ne’ebé ema rihun ba rihun mai atu adora ka hela.
