Udan-boot Afeta Ema 240,000 evakua iha Xina

0
11
Vizaun aérea ida hosi edifísiu no dalan sira ne'ebé inunda iha provínsia Hunan, sentrál Xina nian, hafoin udan-boot iha semana ne'e. STR / CNS

Ema besik kuartu millaun ida maka evakua iha leste Xina nian tanba udan-boot sira kona parte barak iha nasaun no halo mota Yangtze no mota sira seluk sai boot, fó sai hosi imprensa estatál iha loron-kuarta ne’e.

Xina aguenta kondisaun meteorolójika ne’ebé maka’as iha fulan hirak ikus ne’e, hosi udan-been maka’as to’o laloran manas maka’as.

Nasaun ne’e maka emisór prinsipál hosi gás ho efeitu estufa, ne’ebé sientista sira hatete katak hamosu mudansa klimátika no halo eventu meteorolójiku estremu sira sai beibeik no maka’as liu.

Ajénsia notísia estatál Xinhua fó sai katak tempestade sira afeta ona rezidente rihun 991 iha provínsia Anhui no obriga evakuasaun hosi ema rihun 242 to’o loron-tersa loraik.

“To’o tuku 4 loraik iha loron-tersa, udan-boot sira halo ona estragu iha munisípiu no distritu hamutuk 36 iha sidade hitu iha nivel prefeitura nian iha Anhui”, Xinhua fó sai, hodi sita departamentu jestaun emerjénsia provinsiál nian.

Nia hatete katak Yangtze, mota naruk liu iha Xina, haree ona nível bee nian iha nia seksaun Anhui liu marka alerta nian no kontinua sa’e.

Udan-boot sira mós dudu bee sira aas liu sira nia nível alerta nian iha mota 20 seluk no lagoa neen iha provínsia.

Imagen sira iha emisora ​​estatál CCTV iha loron-kuarta ne’e hatudu seksaun ida hosi Yangtze ne’ebé sa’e aas to’o kuaze taka eskultura ida iha sidade Wuhu ne’ebé normalmente hamriik besik metru 12 iha liña bee nian.

Imajen sira hatudu voluntáriu sira ne’ebé lori sumbriña ho jaket mean ne’ebé halo patrulla iha mota nia ninin no halibur kolete salva-vida mean nabilan no boia salva-vida iha tasi-ibun.

Udan-been liu milimetru 100 maka rejista ona iha estasaun meteorolójika atus resin iha Anhui tomak entre tuku 17 loraik iha loron-segunda no oras hanesan iha loron-tersa, haktuir hosi Xinhua.

Iha munisípiu Hexi, besik kapitál provinsiál Hefei, besik milimetru 266 maka rejista ona.

Ofisiál rihun sanulu resin maka destaka ona hodi monitoriza barrajen sira no diku sira iha Yangtze nia sorin, iha Anhui, hatete hosi Xinhua.

Eskritóriu meteorolójiku provinsiál prevee udan barak liu iha área sira Anhui nian hahú hosi loron-kuarta to’o loron-sesta no fó sai alerta sira ba “dezastre jeolójiku sira” iha área sira súl nian.

Udan maka’as hamosu dezastre mortál sira iha parte súl Xina nian iha fulan hirak ikus ne’e.

Inundasaun iha foho iha sentru Hunan hamate ema na’in lima iha fulan liubá, tuir informasaun sira hosi imprensa estatál, enkuantu rai-monu iha provínsia hanesan halo ema na’in ualu mate.

Udan boot no inundasaun halo mós ema na’in 38 mate iha provínsia súl Guangdong nian

LEAVE A REPLY

Please enter your comment!
Please enter your name here