𝐏𝐌 𝐗𝐀𝐍𝐀𝐍𝐀 𝐍𝐎 𝐏𝐌 𝐍𝐎𝐕𝐀 𝐙𝐄𝐋𝐀𝐍𝐃𝐈𝐀 𝐂𝐇𝐑𝐈𝐒𝐓𝐎𝐏𝐇𝐄𝐑 𝐃𝐄𝐒𝐊𝐔𝐓𝐄 𝐊𝐎𝐎𝐏𝐄𝐑𝐀𝐒𝐀𝐔𝐍 𝐑𝐀𝐈 𝐑𝐔𝐀 𝐍𝐎 𝐀𝐏𝐎𝐈𝐀 𝐀𝐃𝐄𝐙𝐀𝐔𝐍 𝐓𝐋 𝐁𝐀 𝐀𝐒𝐄𝐀𝐍

AUSTRÁLIA, 05 Marsu 2024

Primeiru-Ministru, Kay Rala Xanana Gumão, hala’o enkontru bilaterál ho Primeiru-Ministru Nova Zelándia, Christopher Luxon  hodi deskute kooperasaun bilaterál ne’ebé rai rua estabele durante ne’e no ko’alia  mós apoia Nova Zelándia ba adezaun Timor-Leste sai membru plenu Asossiasaun Nasaun Sudeste Aziátiku (ASEAN).

Sorumutu bilaterál entre Xefe Governu Timor-Leste ho Nova Zelándia ne’e hala’o iha Otél Lanhham- Melbourne-Austrália, hafoin lider rua partisipa simeira ASEAN-Austrália, no selebrasaun tinan 50 (1974-2024) Austrália sai nu’udar parseiru estratéjiku ba ASEAN.

Primeiru-Ministru Nova Zelándia, Christopher Luxon reafirma kumpromisu Nova Zelandia nian atu aliña programa apoia hodi reforsa dezenvolvimentu iha  Timor-Leste iha setór edukasaun hodi forma rekursu Timor-oan, no apoia setór defeza no seguransa, inklui apoia ekipa korpus ba páz no programa importante sira seluk tan, liu hosi sira-nia Embaixada  Nova Zelandia nian iha Dili.

Durante enkontru, PM Xanana hato’o agradese ba esforsu Governu Nova Zelandia hodi tulun nafatin povu Timor no ajuda hadia dezenvolvimentu Timor-Leste.

Nova Zelandia nu’udar pais belun ida di’ak ne’ebé haruka forsa Mantensaun Paz hodi ajuda povu no nasaun iha prosesu harii dame no harii estadu.

Enkontru Xefe Governu rai rua ne’e akompaña hosi Vise Primeiru-Ministru no Ministru Koordenadór Assuntus Ekonómikus no Minstru Turízmu no Ambiente, Françisco Kalbuadi Lay, Vise-Ministra ba Assuntus ASEAN, Milena Rangel no Embaixadora Timor-Leste ba Austrália, Inês de Almeida, Xefe Binete Primeiru-Ministru, Elizabeth Exposto no ekipa protokolu sira.

 (Média-GPM)