Iha semana 2 ikus ne’e, Ministerio Saude liu husi Diresaun nasional Saude Publika, Departamentu Vijilansia relata katak moras konjuntivitis hahu mosu no da’et ho lais.
Konjuntivitis maka Inflamasaun matan iha parte konjuntiva ne’ebe geralmente afeta matan (sorin ka rua hotu). Moras ne’e kauza husi infesaun (bakteria, vírus), ou alerjia, ou iritasaun husi sustansia balun.
Maneira moras ne’e da’et:
Konjuntivitis bele da’et liu husi reasaun alergika ruma, rai rahun ka substancias irritantes ruma, bele mos da’et liu husi objetu kontaminadu ruma, ka liu husi ita nia liman ne’e be foer, no kontatu besik ho ema nebe moras matan mean.
Sintomas:
Sintomas jeral maka matan mean, moras no matan-wen suli; no sintomas seluk maka senti hanesan foer iha matan laran, mosu matan ten, hare la mos, la tolera atu hare naroman (fotofobia). Dalabarak mosu uluk iha matan sorin hafoin iha loron ida ka loron rua da’et tan ba matan sorin seluk.
Konjuntivitis ne’ebe frekuente liu maka kauza husi bakteria no nia da’et lalais tebes (Bacteriana Simples ho Gonococica)
Konjuntivitis bacteriana simples nia agente infeksaun frecuente maka estafilococo aureus bele mos husi bakteria seluk hanesan estreptococos, hemophilus no proteus.
Medidas preventivas importantes tebes;
1. Fase liman bebeik ho bé mos no sabaun.
2. Evita uza sasan lisuk hanesan toalha, oklu matan nian, no seluk tan.
3. Labele kaer matan kae oin ho liman nebe foer ka seidauk dezinfeta
4. Evita kontatu besik ho ema nebe sofre konjuntivitis
5. Bainhira ita kona ona matan mean evita ba iha fatin publiku sira hanesan eskola, servisu fatin, merkadu, igreja, loja no seluk tan atu nune’e labele da’et tan ba ema barak.
6. Bainhira ita nia matan mean uza oklu metan hodi redus irritasaun iha matan.
7. Labele uza kualker aimoruk ne’ebe la rekomenda husi mediku sira.
Tratamentu;
1. Konsulta ho pessoal saude sira atu bele fo tratamentu adekuadu no simu akonselamentu mediku ne’ebe diak liu ba ita nia kondisaun
2. Fase ita nia liman no matan frekuentemente
3. Kompres ita nia matan ho be morna kada 2 horas.
4. Redus ka evita uzu telefone ou hare televizaun ba tempu naruk, liu-liu ho ekraun nebe lakan maka’as.
#Medidsas Prevensaun Importante Tebes
#VEDNSPMdSTL
