27.2 C
Dili
Tuesday, June 11, 2024

KHUNTO Lamenta Lia Fuan Hosi Xanana

Must read

DILI—Partidu plataforma entendimentu kompostu hosi partidu FRETILIN, PLP no KHUNTO, hahú ataka polítika prezidente partidu Kongresu Nasionál Rekonstrusaun Timorense (CNRT), Kay Rala Xanana Gusmão, iha plenária parlamentár.

Segundu Vise-Prezidente Parlamentu Nasionál (VPPN), Luis Roberto da Silva, ninia intervensaun katak, partidu jerasaun foun, lamenta ho Xanana Gusmão, hasai liafuan beik-ten ba Prezidente Partidu KHUNTO, Armanda Berta dos Santos.

“Ami partidu KHUNTO lamenta tebe-tebes, tanba husi ami jerasaun foun beik sira ne’e mak Xanana sai matenek, sai naran boot. Ami lamenta ba lider karizmátiku famozu iha nasionál no internasionál, hatún fali nia sidadaun sira,” nia levanta iha plenária Parlamentu Nasionál, Tersa (21/02).

Deputadu ne’e hatete, Xanana Gusmão hamriik iha laletek bele basa nia hasan rasik, tanba hatete Prezidente Partidu KHUNTO beik-ten, tanba sá durante ne’e la hanorin sira atu sai matenek.

Hanesan lider ida tenke iha moral no étika polítiku, la’ós mai hatún fali ema seluk nia direitu, tanba naran Xanana ema selu ho isin, fakar raan, ruin naklekar mak hamosu Xanana iha Timor. Presiza respeita no tane emar sira, ne’ebé sai hosi komunidade.

“Ami partidu KHUNTO husu ba Xanana Gusmão, labele hasai liafuan ida beik-ten ba ami jerasaun foun sira, maibé hanorin ami oinsá bele respeita, atu servi ita rai ba unidade no estabilidade nasionál”, nia husu.

Iha palku polítiku bele ko’alia buat hotu no foho bele kee tetuk hotu, maibé labele indika KHUNTO ninia lideransa dehan ema beik-ten, nu’udar partidu jerasaun foun kontra liafuan ida ne’e.

“Nasaun Timor-Leste ita hotu nian, ita hotu nia kontribuisaun mak ohin loron sai nasaun soberania RDTL, la’ós ema ida nia luta de’it, maibé ita hotu nia kontribuisaun. Hosi ami beik no ki’ak mak imi sai matenek no riku”, nia esplika.

Nu’udar jerasaun foun husu ba lider nasionál ne’e, atu respeita povu beik-ten sira, hosi sira mak ohin loron hanaran ‘Xanana’, labele lori ema beik-ten sira hanesan povu la vale iha palku polítiku.

Antes ne’e Prezidente Partidu CNRT, Kay Rala Xanana Gusmão, hasai liafuan beik-ten ba Prezidente Partidu KHUNTO, Armanda Berta dos Santos, iha atividade konsolidasaun  ne’ebé hala’o iha area Pura, Taibesi, Postu Administrativu Na’in-Feto, munisípiu Dili.

Entretantu intervensaun hodi deputadu Noé da Silva Ximenes ‘Buka Tuir’, realmente Prezidente Partidu CNRT, Kay Rala Xanana Gusmão, ko’alia mak ema ninia beik de’it dezde uluk to’o agora.

“Sera ke Timor ne’e, hothotu matenek hanesan hotu maun Xanana, ita presiza mós dignifika ema seluk”, nia lamenta.

Maski feto mais konsege harii partidu polítiku (KHUNTO), hodi konkorre iha eleisaun eleitorál, hanoin ida ne’e di’ak tebes, maibé Timoroan rasik mak dezakredita maluk feton sira.

Alende ne’e mós deputadu Antonino Bianco, ninia intervensaun katak, se mak konseptór ba partidu CNRT, Sekretáriu Jerál partidu FRETILIN, Mari Bin Amude Alkatiri, la’ós ema seluk.

CNRT 2007 buat seluk ida, mais partidu CNRT agora oinsá, tan ne’e, dokumentu ne’ebé asina hosi Prezidente Partidu CNRT, Rala Xanana Gusmão, hanesan manipulasaun ba ema sira ne’ebé hale’u maun ne’e.

“Ita hatene katak, labele bosok katuas hodi asina dokumentu ne’ebé data hotu laloos, signifika ema sira hale’u maun Xanana, atu halo asina ba dokumentu no dadus”, nia hateten.

Se hakarak fó kondekorasaun ba adeptu partidu polítiku bele ba, mais labele uza símbolu sira seluk, ne’ebé ho dadus laloos. Maluk sira presiza identifika lia loos labele manipula informasaun ho dadus, atu bosok tuun iha povu nia leet. (kyt/PJ9)

- Advertisement -spot_img

More articles

LEAVE A REPLY

Please enter your comment!
Please enter your name here

- Advertisement -spot_img

Latest article