Dili, Timor-Leste – 12 Abril 2024 – Kristin M. Kane, Adjunta Prinsipál ba Asistente Sekretária (PDAS) iha EUA nia Ministériu Negósiu Estranjeiru iha Departamentu Asuntus Públiku Globál, hala’o hela vizita loron tolu mai Timor-Leste.
PDAS Kane ninia prezensa iha Timor-Leste hatudu parseria duradoura entre Estadus Unidus Amérika ho Timor-Leste, bazeia ba ita-nia valór demokrátiku komun sira.
Durante vizita ne’e, PDAS Kane sei envolve ativu ho governu nia ofisiál prinsipál sira, espera sei inklui reuniaun Ministra Edukasaun Dulce de Jesus Soares, no gabinete husi Sekretáriu Estadu ba Inkluzaun.
PDAS Kane haksolok bele hato’o Governu EUA nia mensajen parabéns ba Timor-Leste ninia adezaun ba Organizasaun Mundiál ba Komérsiu foin dadauk ne’e, ida-ne’e hanesan susesu boot ida ne’ebé hetan apoiu maka’as husi Estadus Unidus Amérika no atinjimentu ne’ebé mak hametin liután ita-nia relaasaun bilateral ne’ebé pozitivu, loke tan dalan foun ba kolaborasaun ekonómika.
Otimista kona-ba futuru no Estadus Unidus Amérika ninia parseria no kooperasaun metin ho Timor-Leste, inklui apoiu ativu ba Timor-Leste nia esforsu adezaun ba ASEAN, fornese programa lian Inglés, no apoiu asisténsia dezenvolvimentu substansiál iha setór agrikultura, asesu ba bee moos, no dezenvolvimentu turizmu sustentável, PDAS Kane dehan,
“Interkámbiu kulturál no engajamentu diplomátika sira hametin ita-nia nasaun rua nia ligasaun no promove kreximentu mútua. Ha’u louva Timor-Leste nia susesu adezaun ba iha OMK, progresu adezaun atu sai membru ASEAN, no Timor-Leste nia dedikasaun atu konkretiza kompromisu MCC Compact, hirak ne’e hotu hatudu dedikasaun ba kompromisu atu atinje progresu. Estadus Unidus Amérika prontu nafatin apoia Timor-Leste nia objetivu sira dezenvolvimentu nian.”
Estadus Unidus Amérika nia kompromisu mós estende ba hametin kapasidade seguransa no fronteira marítima, promove kolaborasaun ne’ebé di’ak liután kona-ba esforsu asisténsia humanitária no auzíliu ba dezastre, no kontribui ba projetu infraestrutura hirak hanesan kontinua halo reabilitasaun no atualiza Aerodromu Baucau.
Aleinde envolvimentu diplomátiku sira iha nível altu, PDAS Kane ninia vizita ne’e mós inklui vizita ba Kooperativa Kafé Timor (CCT), reuniaun ho YSEALI nia antigu-alunu sira ne’ebé ativu ba kestaun ambientál, no vizita ba fasilidade resiklazen Caltech – iha ámbitu komemorasaun Loron Rai 2024 – no konklui ho entrevista ekskluzivu ida ho RTTL.
Adjunta Prinsipál ba Asistente Sekretária
Gabinete Asuntus Públiku Global
Kristin M. Kane hala’o kna’ar nu’udar Adjunta Prinsipál ba Asistente Sekretária iha Gabinete Asuntus Públiku Globál. Nia nu’udar Ofisiál Superiór karreira ida ba Servisu Negósiu Estranjeiru ho nível Ministra Konselleira. Sra. Kane foin lalais ne’e hala’o ona kna’ar nu’udar Adjunta Xefe Misaun no Enkarregada Negósiu, ad interim, iha Embaixada EUA iha Lisboa hahú husi tinan 2019 – 2022. Ninia postu sira antes iha Servisu Negósiu Estranjeiru nian inklui kna’ar polítika no asuntus públiku nian iha Embaixada EUA sira iha Brazília, Paris, Dakar (kobre mós Bissau), Maputo, Lisboa, no Konsuladu EUA iha Lagos. Iha Washington, DC, Sra. Kane hala’o kna’ar hanesan Diretora ba Polítika iha Gabinete Inspetór Jerál no antes ne’e serbisu ona ba asuntu hirak kona-ba polítika, komunikasaun sosiál, no kongresu. Sra. Kane hasai Mestradu kona-ba Servisu Negósiu Estranjeiru iha Universidade Georgetown no Lisensiatura iha Universidade Califórnia iha Berkeley. Antes tama iha Ministériu Negósiu Estranjeiru EUA, nia serbí ona nu’udar Voluntária Corpo da Paz iha Guiné, hakerek-nain, no membru ekipa ba ONG. Nia koalia dalen Fransés no Portugés. Nia orijinalmente husi Los Angeles no Monterey, Califórnia.
