DILI-Tribunál Judisiál Primeira Instánsia Dili (TJPID), iha tersa (19/3) halo interrogatóriu dahuluk ba kazu suspeitu na’in tolu ne’ebé ameasa Sekretáriu Estadu Asuntu Toponímia no Organizasaun Urbanizasaun (SEATOU) Germano Dias Santa Brites, durante halo intervensaun iha jogu Bola Gulling iha área Kampun Alor, Suku Kampun Alor, Postu Administrativu Dom Aleixo Munisípiu Dili, iha sábadu (16/3) foin lalais ne’e.
Durante iha prosesu interrogatóriu dahuluk Ministériu Públiku ne’ebé reprezenta hosi Prokuradór Renato Berenahan promove arguidu na’in tolu ho krime obstrusaun autoridade públiku artigu 251 hosi Kódigu Penál Timor-Leste.
Iha alegasaun Prokuradór Renato Berenahan husu ba Tribunál atu aplika medida koasaun Aprezentasaun Periódika (AP) ba arguidu na’in tolu tenke aprezenta aan fulan ida dala ida iha Eskuadra Polísia ne’ebé besik.
Maibé iha prosesu Interrogatóriu dahuluk ne’e, Defeza hosi arguidu na’in tolu Defensór Públika José Maria da Costa Guterres husu ba Tribunál atu aplika medida koasaun Termu Identidade Rezidénsia (TIR,) tanba nia kliente na’in tolu ne’e, tanba faktu la aprovadu katak arguidu na’in tolu, AP, AC no AN, ne’e komete krime obstrusaun autoridade ne’ebé Ministériu Públiku promove ba sira.
Hafoin Tribunál rona tiha parte hotu, Tribunál liuhosi Juiz ne’ebé prezide Primeira Interrogatóriu ba arguidu na’in tolu, Juiza Jumiati Freitas aplika TIR ba arguidu na’in tolu.
Hafoin remata interrogatóriu dahuluk ba arguidu na’in tolu, Defensór Públika José Maria da Costa Guterres, hateten, simu desizaun hosi Tribunál liuliu ba medida koasaun ne’ebé mak Tribunál ba aplika ba kliente sira.
Nia esplika, tanba momentu Sekretáriu Estadu Asuntu Toponímia no Organizasaun Urbanizasaun halo intensaun ba jogu Bola Gulling iha área Ai-tarak-Laran liuliu iha arguidu AC nia fatin momentu ne’e arguidu aprezenta nia dokumentu ba Sekretáriu Estadu Toponímia katak atividade ne’ebé arguidu loke ne’e la’ós ilísitu maibé iha lisensa to’o 24 Maiu 2024.
Nia hatutan katak, faktu la aprovadu katak momentu ne’e arguidu na’in tolu mak hakilar hasoru Sekretáriu Estadu Toponímia durante nia intervensaun iha jogu bola gulling, tanba momentu ne’e ema barak mak hakilar la’ós arguidu sira de’it.
“Iha desizaun ne’e Tribunál aplika medida koasaun TIR ba arguidu nain tolu ne’e. Tanba laiha indísiu forte, tanba sá arguidu sira la halo duni obstrusaun ba autoridade, tanba iha ema barak mak hakilar, la’ós arguidu na’in tolu mak hakilar, tanba ne’e mak laiha provas katak sira mak halo,” Defeza hosi arguidu na’in tolu Defensór Públika Jose Maria hateten ba jornalista sira iha TJPID tersa ne’e.
José Guterres hateten, nia kliente sira mós prontu koopera ho parte justisa bainhira karik ba Ministériu Públiku kontinua loke investigasaun ba kazu ne’e.
“Sira mós hateten prontu nafatin kolabora ho justisa, bainhira Ministériu Públiku kontinua inisia investiga kazu ne’e ba oin liuliu presiza evidénsia ruma, entaun arguidu na’in tolu prontu atu fó sira-nia deklarasaun, “nia konklui.
