Rai-nakdoko ho magnitude 7,9 ne’ebé maka halo nakdoko Myanmar iha loron 28 fulan-Marsu muda antigun kapitál reál hosi reinu birmanés sai rahun, ho maioria hosi edifísiu sira ne’ebé maka eziste sékulu barak iha ne’ebá sofre estragu todan.
Koñesidu mós ho naran Ava, ne’ebé signifika “sidade perla sira nian”, Inwa iha rejiaun Mandalay hanesan kapitál antigu ida Myanmarnian hosi sékulu XIV to’o XIX no iha edifísiu no pagoda antigu hamutuk 961.
Sidade ne’e, hanesan mós atrasaun turístiku ida ne’ebé popular, prepara hela ba nia nomeasaun ba Lista Patrimóniu Mundiál UNESCO nian, haktuir hosi imprensa lokál sira.
Maibé, rai-nakdoko neʼebé makaʼas troka buat hotu. Enkuantu rai nakfera iha tuku 12:50 iha loron-sesta liubá, oras lokál, Inwa nia marka antigu sira, inklui mosteiru sira, estupa sira, estrutura sira ho tinan atus ida, rahun.
“Ami triste tebes katak edifísiu ne’e monu. Ha’u labele kontrola ha’u nia emosaun sira. No la’ós de’it edifísiu ne’e—sira seluk mós monu. Ami laiha ona edifísiu antigu ruma ne’ebé maka hela atu hatudu ba turista sira,” dehan Ma Hlaing, rezidente lokál ida.
To’o loron 2 fulan-Abril, rai-nakdoko estraga uma hamutuk 21.783, edifísiu eskritóriu 805, unidade abitasaun funsionáriu 115, edifísiu eskola 1.041, mosteiru no konventu 921, pagoda 1.690, estrutura relijioza 312 seluk, no ospitál no klínika 48 iha nasaun tomak, informa hosi responsável sira.
Númeru hosi ema mate sira hosi rai-nakdoko ho magnitude 7,9 iha Myanmar aumenta ona ba na’in 3.354, ho ema na’in 4.508 kanek no na’in 220 lakon, haktuir hosi imprensa ofisiál Rádiu no Televizaun Myanmar nian iha loron-sesta ne’e.
