DILI-Xina prontu atu serbisu ho Asosiasaun Nasaun sira Sudeste Aziátiku nian (ASEAN), Japaun, Koreia-Súl no nasaun aziátiku sira seluk hodi harii Ázia ida ne’ebé iha dame no trankuilidade, prosperidade komún, abertura no interkonetividade.
Primeiru-Ministru Xinés Li Qiang hatete iha Kinta-feira, bainhira dirije ba Simeira ASEAN +3 ba dala 27 iha sidade kapitál Laos nian, Vientiane, Li hatete katak nasaun aziátiku sira fahe interese komún, oportunidade komún no buka valór komún.
Xina sei kontinua serbisu ho parte hotu-hotu hodi fó knaar tomak ba mekanizmu Simeira ASEAN Plus Three, apoia sentralidade ASEAN nian iha arkitetura kooperasaun rejionál, no promove dezenvolvimentu rejiaun nian ba tempu naruk, sólidu no estável,” hateten hosi PM Li Qiang, ne’ebé Timor Today sita hosi CCTV+, Sesta (11/10/2024).
Nia husu ba ASEAN esforsu sustentável sira hodi kria ambiente ida ne’ebé favoravel ba rejiaun, hasa’e reziliénsia dezenvolvimentu rejionál nian, no estimula vitalidade inovasaun nian iha rejiaun.
Nia subliña, nesesidade atu avansa implementasaun hosi projetu sira interkámbiu no kooperasaun nian iha área dijitál, intelijénsia artifisiál, verde, kadeia fornesimentu no área sira seluk.
Nasaun sira seluk nia líder sira ne’ebé marka prezensa iha simeira ne’e hatete katak parte hotu-hotu tenke hametin solidariedade no koordenasaun, tane aas multilateralizmu no sira nia valór komún aziátiku sira, salvaguarda sistema komérsiu multilaterál, no implementa tomak akordu Parseria Ekonómika Abranjente Rejionál.
Parte hotu-hotu tenke aprofunda kooperasaun iha ekonomia no komérsiu, finansa, ekonomia dijitál, troka ema ba ema no ekonomia verde, mantein seguransa, estabilidade no reziliénsia hosi kadeia produsaun no fornesimentu, promove interkonetividade rejionál no integrasaun ekonómika, no responde hamutuk ba klima mudansa no dezafiu sira seluk, sira hatete.
Simeira ne’e adota deklarasaun ida hosi líder sira hosi ASEAN, Xina, Japaun no Koreia-Súl kona-ba hametin konetividade hosi kadeia fornesimentu rejionál sira.
