Sama Great Wall Nakonu ho Admirasaun, Obra Magnifiku Tinan 700 Antes Jesus Moris

0
265

Bainhira sei tu’ur iha kadeira eskola primaria  no pre-sekundaria iha Turiscai iha Tempu Indonesia,  liu hosi dixiplina istória no jeografia rona ona “Great Wall” Morru antigu naebe Famozu ona iha mundu.

Ita hotu hakarak ba, inklui ema regular hanesan ha’u sente imposivel bele too iha ne’eba. Maibe realidade hatudu oin seluk. Maski hau ba ona Xina iha 2016, lao servisu Tour Jornalista ASEAN ba China, durante metade fulan-ida, hakarak loos sama ain iha Great wall maibé la realiza. 

Great Wall iha China, hanesan projetu halo hosi ema umana ho medida boot liu iha mundu. Lokaliza iha parte Norte China, projeitu ne’e rasaik halao tuir etapa por etapa. Naran “Wall = morru”  integradu ho sistema defeza hasoru suku seluk ho naran Nomadic, aleinde morru iha mos barreira, torre no bee dalan. Hateke hosi leten, morru Great Wall hanesan Dragaun jigante ne’ebé semo latan iha foho-tutun, foho-lolon mota-koak ho nia naruk besik kil’ometru 21,196 hosi oeste mai leste China.

Iha 20 Outubru 2023, oportunidade osan mean ida, nu’udar Alunu ne’eb’e halo hela estudu Diplomasia no jurnalizmu iha China International Press Communication Center (CIPCC) iha Beijing no depois de finaliza partisipasaun iha simeira Belt and Road Initiative (BRI), ha’u hetan hikas tan oportunidade ba dala tolu hodi ba tan Beijing ninia Great Wall ba dala rua. Iha inisiu programa iha Agostu, vizita ona Great Simatai maibe haree hosi dook de’it tanba tempu vizita apertadu. Ba ona iha Badaling maibé tanba tempu kalan ninia pasiajen laduun haree kompletu.

Iha tinan 1987, Organizasaun Nasoins Undas ba Edukasaun no Kultura (UNESCO) alista hodi konsidera Great Wall pertense ba Patriomóniu mundiál ho ninia orijinalidade relikia klase primeiru.

“Ita besik dadauk. minutu lima tan ita to’o iha fatin destinasaunGreat Wall Huanghuacheng”, rona ida ne’e vizitante sira kompostu hosi jornalista hosi Amérika latina, hosi Áfrika Ásia no Pasífiku, ema liu 60 basa liman no haklalak iha Bus laran.

Konstrusaun Great Wall hahú hosi tinan 700 antes Jesus ( 700BC), liurai antigu siraa hahú konstrui morru hanesan marka sinal ba sira ninia teritoriu hosi ukun empreador dahuluk Qin Shi Huang  konstrui  besik tinan 50 (259 – 210BC), durante tinan 2,000 konstrusaun si kontinua.

Tanba Ami ida idak simu ona kartaun visitor, nune’e la hetan pasa revista iha portaun entrad.  Ami ba iha miudia tuku ida, hasoru ema besik rihun, sira mós fila vizita ona iha dadeer. “Hai… well come to China”  no “Ni Hau Ma, Xie Xie” espresa estudante sira neebe termina sira ninia vizita hodi troka inpresoins ho jornalista sira hodi kumprimenta malu selfi fotografia iha iha portaun no sira termina hodi fila enkuantu ami foin hahu ami nia vizita.

Ohin-loron, Great Wall sai símbolu famozu dada atensaun turista iha mundu. Moru antigu ne’e sei mantein hodi hamriik iha provinsia 15, The well-preserved. Parte nabe’e sei metin too ohin loron nu’udar konstrusaun kontinuasaun hosi Dinastia emperador Ming (1368 – 1644).  

Ha’u ho deit kalsa badak levis, maski loron leno isin tanba hau ninia knua iha foho iha altitude aas, malirin no foho as laos buat foun. Kondisaun lokal malirin halo kolega barak hatais roupa mahar hodi satan  klima malirin hanesan em jeral iha Beijing no Maior parte iha Xina iha fulan Outubru.

Tama hosi portaun haree kedas moru modernu ho medida boot ne’ebé satan ka halibur bee mota, haree hanesan espasu tratamentu bee ne’ebé distribui ba natar ka toos iha fatin refere. Hakat tu’un ba mota sae fali bero hodi tesik ba foho sorin kuaze minutu 10. Huang Huacheng Great wall uniku Great Wall ne’ebé liga bee lihun boot, lagua iha Beijing. Haffoin tuun haree hetan espasu ba restaurante no jardin iha mota ninin no mos espasu ba jogu game pasa ferias eskola ka servisu nian. 

Para minutu balun iha foho lain, kontinua fali sae ba pontu principal, Great Wall Huanghuachen foti hosi koor kinur, tanba iha laletek sira-nee nakonu ho ailaran tuan neebe iha tempu bailoron aitahan sira nakfilak koor ba kinur inklui koorsira seluk, ikusmai influensia area besik ho naran Huanghuachen.

Foin hahu hosi eskada primeiru, jornalista barak oin nakonu ho hamnasa no hotu hotu lasees hosi asaun foto no selfi tantu individu no grupu. La’ós hotu-hotu fasil to foho tutun ho lais. Ba hau, sente la susar tanba iha nee hau sae baibain lalaetek Cristo Rei entaun toman ona sa’e eskada sira.

Ha’u ho halai oituan, lao oituan para no selfie no foto paisajen sira.  To iha klaran haree kolega barak tur sadere ba moru loloon hodi dada is katak ain moras no presiza deskansa oituan. Maibe ami hotu hotu konsege sae to’o tore iha foho tutun. Hotu hotu hamanasa sinal ami hotu ninia kolen selu ho ami ninia susesu to iha laletek tutun metru besik 500 hosi lagoa.

Iha tutun, jornalista sira ida daik espresa katak entre ami sira nee hotu maihosi nasaun no etnia oi oin iha mundu inklui ha’u hosi Timor-Leste sente previlejiadu hodi bele too iha obra antigu ne’e. Sorte monu ba ami to iha fatin neebe famozu iha mundu.

Duante viajen, hau halo video no foto ba ambiente iha foho ne’e. nunka iha mehi atu mai Great Wall, maibe tinan ida ne’e sorte monu ba hau sama ain iha Great wall ba dala rua. Ho ambiente diferente. Iha Badaling Great ba iha tempu kalan no Huanghuachen mai iha tempu rai loron.  

Iha tutun hamriik dada iis ho anin fresku hateke foho sorin-sorin hodi agradese ba beiala Xina ninian ne’ebé sarifika sira ninia moris, maske iha tempu ne’eba laiha teknolojia, laiha mákina no ema matenek enjineiru arkitetu la duun barak, maibé sira kria obra ida magnifiku, nabee hau hosi rai dook bele ba sama ain no kaer ho liman maski moru hirak nee konstrui iha tinan rihun resin ba kotuk.

Ikus liu, ami hotu hotu lao tun ba ofoho hun ho lao ain, tanba ami tenke tun fali ho Cable Car ka karreta elétriku tula ema nain lima kada karreta, ami too hikas foho ain, hemu Xa no kafe inklui han dose no Chesnut, enkuantu chess nut rasik atu hanesna kulu fuan, aihoris ne’e balun ejiste iha area refere tanba kuda hosi liurai ninia soldadu sira bainhira hala’o servisu guarda iha fatin refere iha sira ninia tempu uluk no ami fila fali ba beijing iha oras rai kalan.  

LEAVE A REPLY

Please enter your comment!
Please enter your name here