Prezidente foun Konsellu Administrasaun Rádiu Televizaun Timor-Leste, Empreza Públika (RTTL, E.P), Rosário da Graça Maia, simu ona termu entrega serbisu husi Prezidente sesante, Elizeu Isaac Fernandes, iha serimónia ne’ebé sasin husi Sekretáriu Estadu Komunikasaun Sosiál (SECOMS), Expedito Dias Ximenes, iha Kaikoli.
Rosario da Graça Maia mak profisionál ida ho esperiénsia naruk iha área mídia no komunikasaun sosiál iha Timor-Leste. Iha tinan 48, nia kontribui ativamente ba dezenvolvimentu jornalizmu no komunikasaun públika desde tempu rezisténsia to’o oras ne’e iha nivel nasionál no internasionál.
Rosario moris iha Lete-Foho, munisípiu Ermera, iha loron 10 Outubru 1977. Agora hela iha Comoro, Dili. Nia mak sidadaun Timorense no iha estadu sivíl kaben nain.
Iha área edukasaun, Rosario hetan grau Lisensiadu iha Relasaun Internasionál husi Universidade da Paz, Fakuldade Siénsia Sosiál no Umaniora, iha tinan 2010. Antes ne’e, nia tuir estudu Agribusiness iha Universidade Udayana, Bali, Indonesia (1996–1999), maibé la konsege remata tanba situasaun referendum 1999.
Karreira profisionál Rosario hahú desde tempu estudante, involve iha RENETIL iha Bali iha tinan 1996 no sai jornalista ba Bulletin Loriku Lian iha 1997. Depois referendum, nia servisu ho UNTAET nu’udar Language Assistant no jornalista rádio.
Nia halo parte importante iha dezenvolvimentu Radio Timor-Leste (RTL) no depois RTTL, ho responsabilidade hanesan Xefe Seksaun Notísia Distritu, Xefe Departamentu Programasaun, no Diretór Rádio Timor-Leste entre 2006–2009. Nia mos lidera área programasaun no edukasaun komunitária iha RTTL.
Iha nível organizasaun profisionál, Rosario ativa iha Asosiasaun Jornalista Timor Lorosa’e (AJTL), okupa pozisaun hanesan Xefe Divizaun Relasaun Internasionál. Nia mos sai Media Alerts Stringer ba SEAPA (South East Asia Press Alliance).
Iha área governu no kooperasaun internasionál, nia servisu hanesan asesór mídia ba Sekretaria Estadu Komunikasaun Sosiál (SEKOMS) no depois sai Espesialista Mídia iha Embaixada Estadus Unidus Amérika iha Dili durante tinan barak. Nia mos asumi knaar Supervisory Development Outreach and Communication Specialist iha USAID.
Agora daudaun, Rosario servisu nu’udar Analista Mídia iha UN Women Timor-Leste, kontinua kontribui ba komunikasaun estratéjika no promosaun isu igualdade jéneru.
Iha kompeténsia linguajen, nia domina Tetun, Bahasa Indonesia, Inglés, Português báziku no Mambae.
Durante nia karreira, Rosario tuir formasaun barak iha rai-li’ur, inklui jestaun rádio no televizaun iha AIBD Malaysia, produsaun notísia TV iha Vietnam, koberatura notísia internasionál iha Australia, treinamentu lei mídia, jestaun sala-redasaun iha situasaun pós-konflitu, komunikasaun dezenvolvimentu, no diplomásia vizuál.
Ho dedikasaun naruk ba mídia, Rosario da Graça Maia konsideradu nu’udar ida husi profisionál mídia Timor-Leste ne’ebé iha esperiénsia kle’an, rede internasionál luan no kompromisu forte ba jornalizmu responsavel no dezenvolvimentu sosiál.
prioriza fortalesimentu institusionál durante mandatu
Iha okazaun simu ona termu entrega serbisu husi Prezidente sesante, Elizeu Isaac Fernandes, iha serimónia ne’ebé sasin husi Sekretáriu Estadu Komunikasaun Sosiál (SECOMS), Expedito Dias Ximenes, iha Kaikoli, Rosário Maia hateten katak RTTL iha ona progresu di’ak no sei kontinua dezenvolve baze ba serbisu ne’ebé lideransa uluk halo ona.
“Ha’u-nia prioridade prinsipál mak fortalesimentu institusionál. Ida ne’e inklui armonizasaun baze legál sira atu fó biban ba RTTL hala’o nia knaar tuir vizaun no misaun, proteje direitu no devér traballadór sira, no kria ambiente serbisu ne’ebé profisionál no étiku,” nia dehan.
Nia aumenta katak RTTL presiza adapta ho mudansa tempu, liuliu iha kontextu Timor-Leste nia integrasaun ba ASEAN no dezenvolvimentu era dijitál.
“Ita presiza espande programasaun no moderniza empreza públika ida ne’e atu sai kompetetiva no sai kanál prinsípál hodi konta rasik Timor-Leste nia istória dezenvolvimentu ba públiku nasionál no internasionál,” nia hateten.
Sekretáriu Estadu Komunikasaun Sosiál, Expedito Dias Ximenes, esplika katak termu entrega serbisu importante atu asegura tranzisaun lideransa ne’ebé di’ak.
“Prezidente foun presiza hatene progresu ne’ebé iha ona no área ne’ebé presiza hadi’a, atu lidera RTTL tuir Dekretu-Lei Nú. 42/2008 kona-ba transformasaun RTTL ba empreza públika,” nia dehan.
Nia mós expresa konfiansa katak ho lideransa Rosário Maia nian, RTTL sei sai di’ak liután liuhusi kooperasaun ho parseiru nasionál no internasionál.
Eis-Prezidente RTTL, Elizeu Isaac Fernandes, iha parte seluk hateten prontu nafatin apoia instituisaun ne’e. Nia agradese ba Governu tanba fó konfiansa ba nia durante mandatu.
“Oin mai, ha’u prontu nafatin tulun RTTL bainhira presiza. Mudansa di’ak presiza kontinuidade,” nia afirma.
Konsellu Ministru iha loron 27 Janeiru 2026 aprova nomeasaun Rosário da Graça Maia nu’udar Prezidente Konsellu Administrasaun RTTL, E.P ho mandatu tinan haat.(ttn)
