Ofisiál datoluk hetan kanek. Autoridade lokál sira husu ba rezidente sira atu evita área, besik kilómetru 200 hosi Melbourne, bainhira sira buka ema ne’ebé kaer kilat.
Polísia hosi estadu australianu Vitória nian lansa ona buka ema ida iha loron-tersa ne’e hafoin ema ida ho kilat oho polísia na’in rua iha sidade rurál ida, tiruteiu fatal ida ne’ebé ladún akontese iha nasaun ida ho lei rigorozu sira kona-ba kontrolu kilat nian.
Tiruteiu ne’e akontese iha loron-tersa dadeer bainhira polísia na’in 10 hala’o hela mandadu peskiza nian iha sidade Porepunkah, hatete hosi komisáriu polísia Vitória nian, Mike Bush, iha konferénsia imprensa ida. Mane ida ne’ebé armadu maka’as tiru hasoru sira, hodi hamate ofisiál na’in-rua no hakanek ida seluk, nia hatete.
Komisáriu Bush lakohi identifika ofisiál na’in-rua ne’ebé mate ka ema ne’ebé kaer kilat, ne’ebé nia hatete katak polísia koñese. Ofisiál datoluk nia kanek sira la’ós ameasa ba vida, nia hatete.
Komisáriu husu ba rezidente sira atu hela iha uma laran enkuantu polísia buka ema ne’ebé kaer kilat, ne’ebé nia hatete katak armadu ho kilat oioin no halai mesak hosi propriedade hafoin tiru ofisiál sira. Polísia mós buka hela ema ne’ebé kaer kilat nia parseiru no nia oan sira, no ofisiál sira seluk hatete katak buka ema sei kontinua to’o kalan.
Porepunkah, besik 200 milhas iha rai-laran hosi Melbourne, iha populasaun ida besik ema 1,000, tuir Gabinete Estatístika Austrália nian.
Imagen sira iha mídia sosiál hatudu ofisiál polísia sanulu resin iha área no helikópteru polísia nian ida ne’ebé semo iha leten.
Ofisiál lokál sira taka edifísiu públiku sira, inklui eskola sira. Eskola Primária Porepunkah ativa medida emerjénsia sira hanesan prekausaun iha loron-tersa no estudante no profesór sira hotu seguru, Jill Gillies, diretora, hatete iha entrevista ida liuhosi telefone.
Violénsia ho kilat ladún akontese iha Austrália, iha ne’ebé governu aplika obrigatóriu sosa fali kilat hafoin ema na’in 35 mate iha tiruteiu masal ida iha Tasmánia iha tinan 1996.
Enkuantu tiruteiu sira iha masa ladún akontese, ofisiál polísia ida iha Tasmania hetan tiru mate iha fulan-Juñu enkuantu nia ho ofisiál sira seluk kumpre hela mandadu ida atu hadau fali uma ida. Esklui insidente iha fulan-Juñu, ofisiál na’in 14 maka mate ona iha liña knaar nian dezde 2020, haktuir hosi Memoriál Polísia Nasionál Austrália nian.(Fonte: New York Times)
