HANOI, 14 abril (Xinhua) — Prezidente xinés, Xi Jinping, iha loron-segunda ne’e, apela ba Xina no Vietname atu marxa ba modernizasaun liman ba liman.
Iha nia enkontru ho Prezidente Asembleia Nasionál Vietname nian Tran Thanh Man, Xi mós husu ba parte rua atu injeta estabilidade no enerjia pozitivu liután iha mundu.
Xi hatudu katak nia vizita Estadu ba Vietname dala ida tan permite nia atu asiste realizasaun foun sira iha kauza Vietname nian hosi Doi Moi (reforma) no esperiénsia pesoalmente fundasaun klean hosi amizade Xina-Vietname.
Agora daudaun, Xina avansa hela ho komprensivu konstrusaun nasaun ida ne’ebé forte no kauza boot ba rejuvenesimentu nasionál liuhosi modernizasaun xineza, no Vietname sei hahú era foun ida hosi ascensaun nasionál, Xi hatete, hodi hatutan katak parte rua iha faze krusiál ida hosi sira nia dezenvolvimentu no rejuvenesimentu ida-idak.
Hasoru paizajen internasionál ida ne’ebé nakonu ho mudansa no turbulénsia, Xi hatete, Xina no Vietname tenke hametin konfiansa iha sira nia dalan no sistema sira, hasa’e solidariedade no koordenasaun, kontinua harii komunidade Xina-Vietname ho futuru fahe ne’ebé lori signifikadu estratéjiku, fó liman ba malu hodi marxa ba modernizasaun, no injeta estabilidade no enerjia pozitivu liután iha mundu.
Xi subliña katak tantu Xina no Vietname hanesan nasaun sosialista sira ne’ebé lidera hosi partidu komunista ida, no diresaun polítika maka krusiál ba futuru hosi partidu sira no nasaun sira, no mós ba susesu hosi sira nia kauza sira.
Xi hatete katak líder másimu sira hosi partidu no nasaun rua ne’e tenke troka hanoin sira kona-ba relasaun bilaterál sira no asuntu prinsipál sira hosi preokupasaun komún iha tempu ne’ebé loos, kontinua harii konsensu, hasa’e konfiansa mútua no dirije dalan ho beibeik, atu nune’e bele garante progresu ne’ebé metin hosi relasaun sira Xina-Vietname nian.
Presiza mantein troka sira no kooperasaun entre partidu rua, órgaun lejislativu sira no organizasaun konsultivu polítiku sira, no fahe nafatin esperiénsia sira governasaun nian, Xi hatutan tan.
Parte rua ne’e tenke foti aniversáriu relasaun diplomátika ba dala 75 no Tinan Interkámbiu Povu-ba-Povu Xina-Vietnam hanesan oportunidade ida hodi lori ba oin “jéniku mean” no uza di’ak rekursu revolusionáriu sira hodi hasa’e komprensaun mútua no amizade entre povu rua, liuliu jerasaun foun, no hametin lasu amizade entre nasaun rua, Xina aumenta.
Rekoñese interkámbiu sira ne’ebé akontese beibeik no kooperasaun ne’ebé fó fuan entre Kongresu Nasionál Populár Xina nian no Asembleia Nasionál Vietname nian, Xi hatete katak lejislatura nasaun rua nian tenke halo buat barak liután hodi hametin amizade tradisionál, asegura kooperasaun prátika no hametin koordenasaun multilaterál, hala’o interkámbiu sira kona-ba dezenvolvimentu demokrasia sosialista no ukun direitu nian, no enrikese beibeik substánsia Komunidade Xina-Vietname ho futuru ne’ebé fahe.
Husi nia parte, Tran Thanh Man hatete katak Vietname no Xina, ne’ebé liga hosi foho no mota sira, harii ona amizade sinseru ida ne’ebé hatudu “kamaradajen no maun-alin” ho kuidadu hosi líder susesiva sira hosi partidu no nasaun rua ne’e, no parte rua ne’e mantein relasaun amizade sira ne’ebé kleur ona.
Nia hatete katak vizita hosi Xi, mós sekretáriu-jerál hosi Komité Sentrál Partidu Komunista Xina nian (PCC), hatudu tomak importánsia ne’ebé maka PCC, nasaun no povu Xinés fó ba relasaun sira Vietname-Xina nian.
Nia hatete katak sekretáriu-jerál na’in-rua fó ona orientasaun estratéjiku importante kona-ba avansu konstrusaun komunidade Vietname-Xina nian ho futuru fahe ne’ebé lori signifikadu estratéjiku, ne’ebé sei loke kapítulu foun ida iha relasaun bilaterál sira.
Asembleia Nasionál Vietname nian felisita Xina tanba konvoka ho susesu “sesaun rua” no hein atu hala’o komunikasaun besik no koperasaun ho Kongresu Nasionál Populár Xina nian, hodi implementa konsensu importante ne’ebé hetan hosi líder másimu sira hosi partidu no nasaun rua ne’e, no kontribui ba prosperidade komún no dezenvolvimentu hosi amizade hosi nasaun rua no amizade entre povu, Tran Than hatete. ■
