Rúsia sei lansa kampaña rekrutamentu militár primavera ida ne’ebé envolve joven rihun 160 ho tinan entre 18 no 30, haktuir hosi dekretu ne’ebé asina hosi Prezidente rusu Vladimir Putin.
Kampaña rekrutamentu ne’e aumenta númeru sira hosi tinan rua liubá, enkuantu ezérsitu garante katak rekruta foun sira ne’e sei la haruka ba Ukránia, nasaun ida ne’ebé maka forsa rusu sira ataka dezde fevereiru 2022. Kampaña ne’e organiza dala rua iha tinan ida, iha primavera no outono, no hahú iha loron-tersa, haktuir hosi despaxu ne’ebé asina hosi Vladimir Putin no publika ba loron-feira. Tuir dekretu, sidadaun rusu rihun 160 ho tinan entre 18 no 30 sei konvoka ba servisu militár entre loron 1 fulan-Abril no loron 15 fulan-Jullu tinan ne’e.
Kampaña primavera nian envolve ema rihun 150 iha tinan 2024 no rihun 147 iha tinan 2023, haktuir hosi ajénsia notísia rusu Tass. “Kampaña rekrutamentu ne’ebé sei mai laiha ligasaun ho operasaun militár espesiál iha Ukránia”, hatete hosi Ministériu Defeza rusu nian iha komunikadu.
Membru seniór ida hosi Estadu-Maiór Jerál, Vise-Almirante Vladimir Tsimlianski, hatete katak rekruta sira sei la haruka ba rejiaun ukranianu sira ne’ebé maka ezérsitu rusu halo funu. Sira mós sei la partisipa iha “tarefa operasaun espesiál sira”, nia hatete, haktuir hosi komunikadu imprensa ministériu nian.
Iha 2023, Rúsia adota lei ida ne’ebé hasa’e limite idade ba konskrisaun hosi tinan 27 ba tinan 30. Agresaun iha Ukránia halo autoridade rusu sira haruka mobilizasaun ba ema liu 300,000 iha Outubru 2022. Rusu barak maka sai hosi nasaun tanba tauk atu hetan mobilizasaun.
