Donald Trump nia retornu ba Casa Branca muda ona lalaok programa diversidade nian iha EUA. Iha loron hirak ikus ne’e, influénsia hosi nia polítika sira tenta atu habelar iha Atlántiku tomak ho Administrasaun Trump haruka karta sira hodi fó presaun ba empreza sira iha Uniaun Europeia hodi abandona promosaun hosi diversidade ho kondisaun katak sira kontinua serbisu ho Washington. Paris no Bruxelas denunsia ona tentativa hosi EUA ba “interferénsia inaseitavel” no promete atu kontinua proteje sira nia valór sira.
Iha loron-sesta, embaixada sira Estadus Unidus nian hakerek karta ida ba empreza franseza no europeia oioin hodi informa sira katak Administrasaun Trump nia represaun hasoru polítika sira diversidade, ekuidade no inkluzaun (DEI) nian aplika mós ba empreza sira iha mundu tomak ne’ebé buka atu halo negósiu ho governu Estadus Unidus nian.
Aleinde karta, haruka mós kestionáriu ida ba empreza sira, hodi husu karik sira iha programa antidiskriminasaun internu sira iha fatin, ne’ebé bele impede sira hodi serbisu ho Governu norte-amerikanu, haktuir hosi imprensa franseza.
“Kontratór sira hotu hosi Departamentu Estadu nian tenki sertifika katak sira la opera programa promosaun DEI (Diversidade, Ekuidade no Inkluzaun) ruma ne’ebé viola lei anti-diskriminasaun aplikavel sira no konkorda katak sertifikasaun ne’e esensiál ba objetivu sira hosi desizaun pagamentu Governu nian no tanba ne’e sujeita ba Lei hosi Reklamasaun Falsu sira”, haktuir hosi dokumentu sira hosi FranceInfo.
Karta husu ba destinatáriu sira atu prenxe, asina no fó fila, iha prazu másimu loron lima, formuláriu ne’ebé sertifika katak sira “laiha programa ruma hodi promove diversidade, ekuidade no inkluzaun”, tuir jornál Le Figaro.
“Karik ita-boot sira la aseita atu asina dokumentu ne’e, ami sei apresia se ita-boot sira bele fó mai ami razaun detallu sira, ne’ebé ami sei pasa ba ami nia ekipa jurídiku sira”, haktuir karta ne’ebé tuir The Guardian haruka mós ba empreza sira iha Itália, España no Europa Orientál.
“Interferénsia norte-amerikanu la aseitavel” Reasaun hosi Paris, ne’ebé mai hodi defende nia empreza sira, la kleur: “Interferénsia norte-amerikanu iha polítika sira inkluzaun nian hosi empreza franseza sira – hamutuk ho ameasa sira hosi tarifa sira ne’ebé la justifikadu – la aseitavel”, hatete hosi Ministériu Komérsiu fransés nian iha komunikadu.
Fransa ho Europa sei kontinua defende “empreza sira, sira nia konsumidór sira, maibé mós sira nia valór sira”.
Iha entrevista ida ba programa dadeer nian hosi RTL, ministru Komérsiu fransés nian, Laurent Saint-Martin, hatete iha loron-segunda ne’e katak “hakfodak tebes” ho karta hosi Administrasaun Trump nian ne’ebé husu ba empreza sira hodi “renunsia polítika sira inkluzaun nian” ne’ebé tuir lejislasaun franseza no europeia no garanti katak sei mantén “atensaun tebes” ba asuntu ne’e.
“Ami sei diskute asuntu ne’e ho embaixada norte-amerikanu iha Fransa, tanba ami presiza kompriende saida maka intensaun loloos iha karta ne’e nia kotuk,” nia afirma.
“Loos duni katak ita presiza mantein ajenda pozitivu ho Estadus Unidus.Ita-boot sira sei nunka hetan ha’u, nein governu, nein Prezidente Repúblika, tuir ajenda beligerante ho Amerikanu sira.Ami iha ne’e atu halo negosiasaun, ami iha ne’e atu hala’o diplomasia ekonómika,” konklui ministru.
Ministra franseza ba Igualdade Jéneru nian, Aurore Bergé, iha deklarasaun ida ba kanál franseza BFMTV, konsidera katak karta hosi Administrasaun Trump nian hanesan “forma interferénsia” ida ne’ebé klaru hosi Washington. “Hanesan tentativa ida hodi impoin diktadu ida ba ami nia empreza sira”, nia denunsia.
“Ita laiha lisaun atu aprende hosi xefe Amérika nian” Kondenasaun mós multiplika iha viziñu Béljika. Vise-primeiru-ministru belga, Jan Jambon, kritika maka’as hasoru Prezidente norte-amerikanu iha loron-domingu iha diskursu sira ba RTL-TVi. “Ami laiha lisaun atu aprende hosi xefe Amérika nian,” nia hatete.
Ministru Negósiu Estranjeiru belga nian garante katak “Béljika sei la halo pasu ida ba kotuk” no hatutan tan katak “Governu estuda hela dalan di’ak liu hodi hatán legalmente ba EUA”, haktuir hosi jornál HLN.
Entretantu, administrasaun Trump nia luta hodi hamenus medida sira diversidade nian kontinua iha Estadus Unidus, iha ne’ebé maka reguladór norte-amerikanu sira iha semana liubá tau Walt Disney Company no ABC iha investigasaun nia okos, hodi akuza sira tenta kombate diskriminasaun iha internu.
