Dili, 17/09/2025 – Parlamento Nasionál (PN) konkorda atu halakon lei kona-ba pensaun mensal vitalísia ba deputadu, hafoin manifestasaun kontinua hosi estudante universitariaun sira iha Dili. Aksaun ne’e mosu rezultadu hosi kompromisu entre PN no Estudante Universidade Timor-Leste (EUTL) kona-ba revoga lei pensaun, no altera dekretu lei númeru 1/2006 kona-ba liberdade reuniaun no manifestasaun, liliu distância 100 metrus hosi edifísiu públiku.
Manifestasaun ne’e envolve estudante hosi UNITAL, UNTL, UNPAZ, IOB, UNDIL, no apoiu hosi kamada sosial sira, ne’ebé kontinua halibur iha resintu Kampus Sentral UNTL.
Porta-voz EUTL, José da Costa, iha orasiu husu ba estudante no manifestante sira atu “mantein damen, amizade no evita anarkismu” hodi fó fokus ba objetivu prinsipál: kontra PN kona-ba pensaun vitalísia no altera lei distancia 100 metrus.
“Ita-nia manifestasaun kontinua la’o. Ita hotu tenki asegura paz, kontrola an no la bele halo anarkismu. Agora ita bele fó presionu atu osan publiku tau ba setor produtivu hanesan edukasaun, saúde, agricultura, infra-estrutura no turismo. Ohin ita manan ona, lei pensaun mensal vitalísia halo ona akordu hodi halo lakon,” hateten José.
Segurança máxima garante hosi Póliisia Nasionál Timor-Leste (PNTL) hamutuk ho Servisu Nasional Inteligénsia (SNI).
Manifestasaun loron rua ne’e fo resultadu: manifestante sira liu sanulu hetan kanek, karreta estadu ida hetan sunu, karreta PNTL ida no karreta diplomata União Europeia ida vidru rahun.
Lembra katak PN semana kotuk aprova ona kanselamentu sosa karreta ba deputadu 65, maski kestaun rua seluk seidauk iha desizaun final.
