Governu liuhusi Ministériu Administrasaun Estatál (MAE), Segunda (01/09), fó pose ba Prezidente Autoridade Munisípiu (PAM) Dili, Fransisco dos Santos, no PAM Bobonaru, Paulo Moniz Maia.
Ministru Administrasaun Estatál, Tomás do Rosário Cabral, dehan Prezidente Autoridade iha munisípiu reprizenta Governu sentrál atu organiza, koordena no mantein orden serbisu administrativu.
Orientasaun ba PAM foun
“Prezidente autoridade nia subordinadu mak ema ne’ebé serbisu ba autoridade postu administrativu sira. Se la iha koordenasaun di’ak, administrasaun sei la la’o bá oin,” — hateten Ministru Cabral iha resintu edifísiu MAE, Kaikoli.
Governante ne’e mós husu PAM Dili no Bobonaru atu konsolida-an, servisu hamutuk, no kumpre orientasaun Primeiru-Ministru kona ba tranzisaun ba administrasaun lokál.
“Ohin iha juramentu dehan, ami sei firme, leál no servisu povu. Ami sei la mete ba grupu,” nia hateten, hafoin fó pose.
Prioridade PAM Bobonaru
PAM foun Bobonaru, Paulo Moniz Maia, promete kontinua programa di’ak hosi PAM sesante sira, no muda buat sira ne’ebé ladi’ak.
“Ha’u sei kontinua buat di’ak, ladi’ak sei troka. Ha’u prioridade povu nia moris di’ak, estrada bázika, no dezenvolve agrikultura tanba Bobonaru nia área potensiál boot mak agrikultura,” nia husu.
Foku PAM Dili
Iha parte Dili, PAM foun Fransisco dos Santos sei foka ba problema inundasaun, lixu no engrafamentu iha kapitál.
“Problema barak hahú husi númeru veíkulu ne’ebé aumenta. Ha’u sei servisu hamutuk ho entidade sira atu rezolve parrajen karreta sira nian vertikál,” nia promete.
Antezedente
- Gregório Saldanha simu pose hanesan PAM Dili iha 01 Marsu 2024 no hatama karta rejigna-an iha 28 Janeiru 2025. Depois, Diretór Jerál Desentralizasaun no Governu Lokál, António Agosto Guterres, asume interinu to’o agora.
- Iha Bobonaru, Alexandrino Pires simu pose iha 06 Marsu 2024, maibé suspende iha 05 Juñu 2025 hosi Ministru MAE. Nia substitui ho Celestino Marques hanesan Koordenadór temporáriu to’o fulan Agostu 2025.
Fonte Notisia TATOLI
