DILI – Governu Repúblika Demokrátika Timor-Leste hato’o nia konsternasaun no solidariedade ne’ebé kle’an ho Governu no Povu sira iha Tailándia no Myanmar nian, ne’ebé afetadu maka’as hosi rai-nakdoko ho magnitude 7,7 ne’ebé halo nakdoko iha rejiaun iha Sesta 28 Marsu 2025, afeta estragu materiál ne’ebé signifikativu.
Autoridade tailandeza sira konfirma ona to’o oras ne’e pelumenus ema na’in tolu nia mate iha Bangkok hafoin edifísiu ida ne’ebé sei konstrui monu, ho ema sanulu resin ne’ebé maka sei fó sai hanesan lakon. Iha Myanmar, rai-nakdoko, ne’ebé nia episentru lokaliza besik sidade Mandalay, hamosu deklarasaun estadu emerjénsia nian iha rejiaun oioin nasaun nian.
Timor-Leste hamutuk iha sofrimentu povu maun-alin sira rejiaun nian no hato’o nia sentidu kondolénsia sinseru liu ba família vítima sira nian, hodi dezeja rekuperasaun lalais ba sira ne’ebé kanek no ba sira ne’ebé afetadu diretamente hosi kalamidade ne’e. Governu hamriik iha solidariedade ho esforsu emerjénsia no rekonstrusaun nian iha nasaun afetadu sira, hodi rekoñese reziliénsia no forsa hosi sira-nia populasaun sira iha tempu adversidade boot ida-ne’e.
Porta-vós Governu Konstitusionál IX, Ministru Agio Pereira, hodi Governu tomak nia naran, espresa nia “solidariedade ho povu no Governu sira Tailándia no Myanmar nian ne’ebé afetadu hosi katástrofe ida-ne’e” no afirma katak “iha momentu difisil ida-ne’e, ami-nia hanoin hamutuk ho vítima sira no sira-nia família no ami elojia kompromisu hosi sira hotu ne’ebé dedika an atu kontinua buka sira no atu tulun komunidade sira ne’ebé afetadu.(Komunikadu Governu)
