TAILÁNDIA-Rai-nakdoko ho magnitude 7,7 ne’ebé sentra iha noroeste Mandalay, Myanmar, kauza ema mate no kapitál Tailándia sofre estragus hosi sentru to kilómetru rihun ida no perturba negósiu no transporte públiku.
Rai-nakdoko, ne’ebé ho profundidade kilómetru 10, akontese iha tuku 12:50 lokraik. oras lokál ka tuku 1:20 lokraik iha Tailándia, tuir Servisu Jeolójiku Estadus Unidus nian, kilómetru 17 ba norte sidade boot daruak Myanmar nian.
Departamentu Meteorolójiku Tailándia nian hatete katak risku ba tsunami ki’ik tanba rai-nakdoko ne’e akontese iha rai-maran.
USGS relata rai-nakdoko ho magnitude 6.4 minutu 12 hafoin nakdoko inisiál.
Rejimi militár Myanmar nian hatete katak “ema balun mate ona no barak maka hetan kanek” no lori ona ba ospitál sira, lahó fó sai detalle sira. Nia fó sai apelu urjente ida ba doasaun raan nian iha ospitál sira iha área afetadu sira, liuliu Rejiaun Sagaing, Rejiaun Mandalay no kapitál Naypyitaw.
Komité Jestaun Dezastre Naturál deklara ona estadu emerjénsia iha Sagaing, Mandalay, Magway, Shan North-east no Naypyitaw no Bago. Nia fó hanoin ba “públiku atu hela iha área seguru sira tanba hein katak réplika sira sei kontinua ba oras neen tan tuir peritu sira hosi Departamentu Meteorolojia no Hidrolojia nian”.
Media lokál sira hatudu jenerál Min Aung Hlaing, líder rejime nian, halo inspesaun ba zona sira ne’ebé afetadu hosi rai-nakdoko iha Naypyitaw.
Myanmar hetan estragu tanba funu sivíl dezde jenerál sira hadau podér iha Fevereiru 2021.
Feto ida iha Mandalay, ne’ebé iha populasaun millaun 1,5, ne’ebé lakohi fó sai nia naran, hatete: “Edifísiu barak maka monu, no ha’u labele kontaktu ha’u nia família iha Sagaing. Liña telefone sira mós la funsiona.”
Mane ida iha sidade ne’e hatutan tan katak edifísiu oioin iha palásiu nia sorin hetan destruisaun no ponte ida hosi era koloniál ne’ebé liga Mandalay ho viziñu Sagaing monu ba mota ida.
Rezidente ida hosi Yangon, sidade boot liu iha Myanmar, hatete katak nia la konsege kontaktu ho nia família iha Mandalay. “Ha’u preokupa tebes ho ha’u nia família. Ha’u nia inan-aman hela iha edifísiu tuan tebes iha Mandalay.”
Iha Bangkok edifísiu ida hosi Gabinete Auditoria Estadu nian ho andár 30 ne’ebé harii metade iha distritu Chatuchak monu, hodi halo pelumenus ema na’in tolu mate no na’in 90 dadur, haktuir hosi ministru Defeza Phumtham Wechayachai. Vídeo sira ne’ebé publika iha online hatudu traballadór konstrusaun sira halai sai hosi fatin ne’e. Edifísiu ne’ebé monu besik Merkadu Chatuchak, bazar boot ida iha liur ne’ebé popular entre turista estranjeiru sira. La klaru kedas se iha vítima ruma.
Rascacéus sira iha fatin seluk iha kapitál Tailándia nian nakdoko bainhira traballadór sira, rezidente sira no turista sira evakua edifísiu eskritóriu sira, otél sira, kondomíniu sira no embaixada sira. Phumtham hatutan tan katak Bangkok sensivel liu ba rai-nakdoko sira tanba sidade ne’e harii iha rai-mean ne’ebé mamar.
Bolsa Tailándia nian suspende atividade komérsiu hotu-hotu iha tuku 2 lokraik. Estasaun hotu-hotu hosi Sistema Tránzitu Masal Bangkok (BTS) Skytrain no sistema Tránzitu Rápidu Metropolitanu subterráneu taka ona.
Primeiru-ministru tailandés, Paetongtarn Shinawatra, ko’alia hosi sidade Phuket, iha súl, deklara Bangkok hanesan zona emerjénsia no haruka ajénsia governamentál sira atu atualiza públiku ho transmisaun sira hosi telemóvel.
Fornesedór teknolojia prinsipál sira no fabrikante automotivu sira hatete katak sira hetan interupsaun uitoan de’it hosi rai-nakdoko. Delta Electronics hatete katak nia liña produsaun suspende operasaun sira durante oras ida no hafoin ne’e hahú fali fabrikasaun. KINPO, Quanta no Lite hotu-hotu relata katak sira nia liña sira la afetadu.
Nissan Motor hapara produsaun hodi evakua funsionáriu sira iha nia fábrika iha leste Bangkok nian. Fábrika produsaun Honda nian iha Ayutthaya, iha norte Bangkok nian, hahú fali produsaun hafoin para temporariamente. Toyota nia fábrika Gateway kontinua funsiona hanesan baibain. Bangkok nia aeroportu sira la hetan afetadu.
Diretór-jerál Departamentu Meteorolójiku Tailándia nian hatete katak episentru rai-nakdoko nian iha kilómetru 326 hosi provínsia Mae Hong Son, ne’ebé halo fronteira ho Myanmar. Ko’alia iha Facebook Live, nia husu ba públiku atu hela iha área sira ne’ebé nakloke no hein anúnsiu sira seluk hosi autoridade sira.
Rai-nakdoko ne’e sente mós iha sudoeste Xina no Vietname. (fonte NIKKEI ASIA)
