Liquiça, 09 Novembru 2025 — Dirijente ida ho feto ida ne’ebé servisu iha Servisu Nasionál Intelijénsia (SNI) detidu hosi ekipa konjunta PNTL no F-FDTL, tanba dehan uza karreta estadu atu transporta sasán kontra bandu (fogetes) hosi Atambua, Indonézia, mai Dili liuhosi Postu Fronteira Motaain, Sábadu kalan (08/11).
Dezanvolvimentu kazu ne’e mosu bainhira karreta estadu ho númeru 05.424 G, ne’ebé suspeitu sira lori, para iha Eskuadra Polísia Munisípiu Liquiça hodi submete ba identifikasaun hosi autoridade sira.
Komandante PNTL Munisípiu Liquiça, Superintendente Calisto Gonzaga, konfirma kazu ne’e ba Hatutan.com Domingu (09/11), dehan ekipa konjunta detén dirijente SNI na’in-rua ho inisiál AM no OMS, ne’ebé lori karreta estadu ida tula fogetes dós 36.
“Loos duni, ami asegura hela karreta estadu ida transporta fugetes ne’ebé konsidera sasán kontra bandu. Ami deskreve ona, agora Ministériu Públiku ho Tribunál maka sei kontinua investiga,” hateten Superintendente Calisto Gonzaga.
Nia klarifika tan, sasán kontra bandu ne’e la iha rejistu iha lista importasaun ofisiál no suspeitu sira labele hatudu dokumentu legál ida. Kazu ne’e sei submete ba Ministériu Públiku (MP) Segunda-feira (10/11), tanba Domingu la konsege rejista ofisiálmente.
“Sasán ne’e hela assegura iha komandu PNTL Liquiça. Ministériu Públiku no Tribunál sei fó média ba suspeitu sira, no la’o tuir prosesu legál nian,” hateten Calisto Gonzaga.
De acordo ho fonte polísia, fogetes item “shoot 8” no “shoot 10” inklui mos item lubuk ida detidu iha karreta estadu. Sasán ne’e uza partikularmente, maibé transporte karreta estadu, halo violasaun ba regra importasaun no etik estadu.
Durante prosesu identifikasaun, suspeitu sira sei fó deklarasaun iha Ministériu Públiku atu esplika tanbasá maka lori sasán ne’e liuhosi fronteira no uza karreta estadu.
Provizoriamente, suspeitu sira liberadu temporáriamente, tanba konsidera servisu iha institusaun estadu, maibé sei kontinua inkeritu legál. (Fonte Notisia Hatutan)
