MANATUTO, 02 Agostu 2025 – Primeiru-Ministru (PM), Kay Rala Xanana Gusmão, akompaña hosi Ministru Obras Públikas (MOP), Samuel Marçal, realiza serimónia hatuur fatuk da-huluk hodi inicia konstrusaun ponte Lamara, iha suku Manehat, postu Natabora, Manatuto, iha loron sábadu (02/08/2025).
Ponte ne’e sei liga komunidade Manehat ho Natabora, no projetu nia orijem iha kontratu TENDER/185/MOP-2024 ho valor $4,605,887.72. Ponte ida-ne’e ho naruk 100 metru no luan 7 metru, no sei hala’o durante loron 365, tuir supervizaun hosi MOP.
Iha diskursu nian, PM Xanana husu ba empreza responsavel Sandong Hejian Construction Group atu hala’o projetu ne’e ho seriedade no kualidade, tanba povo sei uza ponte ne’e ba tempu naruk. “Ha’u husu ba empreza atu halo ho didi’ak, tanba ponte ne’e la’ós ba governu deit, maibé ba povo Timor-Leste, liu-liu povo Barique-Natarbora,” nia hateten.
Xanana mós fó apelasaun ba lideransa governamentál atu tau matan ba komunidade sira iha zona ne’e, ne’ebé mak iha kontribuisaun boot ba luta independénsia nian. Nia husu mós ba juventude Natarbora sira atu estuda no prepara-an ba futuru. “Natarbora sei sai hanesan ponte bo’ot ba receitas mai Timor,” Xanana hamutuk.
Ministru Samuel Marçal, iha fatin hanesan, asina kontratu ho empreza iha oin publiku, no hateten katak PM fó instruzaun atu uza osan povu ho responsabilidade. “Ha’u asina kontratu iha oin imi hotu tanba ha’u reprezenta imi,” nia deklara.
Ren Yong Jie, representante empreza Sandong Hejian, promete atu hala’o projetu ho kualidade no tuir data kontraktu. “Ha’u prontu finaliza no entrega ba Governu tuir data ne’ebé defini ona,” nia hateten.
Serimónia nian loke ho tara tais ba PM, hamutuk ho bensaun tradicional hosi lia-na’in sira no Amu Vigáriu Parókia Welaluhu, Frei Domingos Xavier OFM. Aktu simboliku konstrusaun nian hala’o ho mákina pezadu, no kuadru projetu loke ofisialmente.
Partisipante sira inklui membru governu sira, autoridade munisipál Manatuto, ADN, tekniku MOP no komunidade Natarbora tomak. Fonte Média-GPM
